مکتبلرین آچیلیش موناسیبه تی ایله گونئی آذربایجان میللی بیرلیک شوراسی نین بیلدیریسی

1304 نجو گونش ایلینده، "ریضا میرپنج"ین یابانجیلار یاردیمی ایله، "قاجار محروسه مملیکتلرایمپاراطورلوغو" قارشیسیندا یاپدیغی و بو حکومته سون وئردیگی کودیتادان، 82 ایل گئچیر.

بیر حالدا ایرانین هر بیر یئرینده، مهر آیی نین ایلک گونونده، مکتبلر آچیلاجاق کی بیلیمه و دوشونجه یه قارشی اولان آریاچی تعلیم- تربیت دوزه نی، ایران کیمی چوخ میللتلی بیر اؤلکه ده ، 82 پاییز اوتور.  بو اؤتن ایللرده ایران خالقی نین 4 نسلی، اؤز شخصی و میللی حایاتی نین باهاسی ایله، "آریاچی لار دهشتی"نین و "ویلایتچی لر وحشتی"نین تجروبه سینه باخمایاراق، دیره نیشه و هایکیریشا احتیاج اولدغو زامان، بیزیم یاپدیغیمیز یئرسیز و زامان سیز سس سیزلیکلردن و حرکتسیزلیکلردن دولایی، تاسسوفله هله ده فارس شوونیزمی نین کسکین ژیلتلری، دورمادان ایران میللتلری نین  و قومیتلری نین  اوزه للیکله بویوک آذربایجان میللتی نین بیلگی لرینی و باخیشلارینی بالتالاماقدادیر.   

جسارتلی و صداقتلی آذربایجان، 1261 نجی گونش ایلینده میرزا حسن روشدیه جنابلاری نین هیمتی ایله ایران تاریخی نین ایلک چاغداش مکتبینی آچسادا، "وطن دیلی" آدیندا ایلک تورکجه درسلیک کیتابینی یازسادا، چاغداش مکتبلرین آچیلماسیندا ان قورخونج گئریچی گوجلر ایله چیرپیشسادا، وطن قیزلارینین مکتبه گئتمه سی ایچین دیره نسه ده، آنجاق سونوچدا آریاچی فاشیست اربابلاردان یالنیز میللی و اینسانی غورورونون آلچاقلانماسینی، تاریخی نین یالانلانماسینی و حتی خالقی نین اولدورولمه سیندن باشقا بیر یارار گوره مه دی.

پان آریانیستلر ایش اوستونه گلدیکدلریندن و ایران اولکه سینی اوز شخصی مولکلری آنلادیقلاریندان سونرا، غیری فارسیستان اراضی سینده "یانیق یئر" توطیئه سینه، "یانیق بئیین" فیتنه سینیده آرتیردیلار و بئله لیکله جاعیللیک و جاهیللیک ایله، بیلیم و علیم یئرینی دولدوردولار.

آذربایجان میللتی، مینلر ایللیک میللی یاشامیندا خوصوصیله موعاصیر یوز ایلده، جاندان باشدان کئچه رک چالیشمیش کی جهالتین دئوین و سفاهتین هئیوه ره سین اؤز دیرایتینه و شوجاعتینه دایاناراق یئنسین. یازیقلار اولسون کی فاشیزم قوزغونو، بو قدر چالیشمالارا رغما کودیتا واسیطه سیله ایرانا ائنیب، علملر و فنلر خاناسی نی داغیدیب، آغیلی سورونگنلر و یارالی لئش ییه نلرین یوواسی ائدیبدیر.

اگر آذربایجان اولوسو تعلیم و تربیه تمللرینی "اویرن اوزگه دیلینی ... یاشات آنا دیلینی"( خلیل رضا اولو تورک) شوعارینا دایالی قورسادا، فارسین خیالچی شوونیزمی، بوتون اینسان و جاهان بینوره لرینی سوکه رک ایسته دیگی تعلیمات آماجلارینی شعار کیمی قولانیلان بو شعرین اوزانتیسیندا قوروب اؤز قودوز دیشلریله تورک میللتی و بوتون باشقا غیری فارس میللتلرینین بوغازینی سیخدی: "زبان ترک از پس قفا کشیدن است/ صلاح پای این زبان ز مملکت بریدن است/دو اسبه با زبان پارسی از ارس پریدن است.../نسیم صبحدم خیز، بگو به مردم تبریز/که نیست خلوت زرتشت، جای صحبت چنگیز..."(ابوالقاسم عارف).

ریضا شاه پهلوی زامانیندا بئله بیر چیرکین سیاستلرین ایجرا اولونماسی نین آردیندان، آذربایجان میللتی نین و هابئله باشقا غیری فارس میللت لرین میللی گوزه نکلری، سونگو گوجو ایله، بیرر بیرر  قاپاندی و بئله لیکله دیل، موسیقی، اینجه صنعت، صنعت، ایقتیصاد،... و قیساجاسی "تورک- آذربایجان" مدنیتی درین بیر یالانلاما، آغیر بیر آشاغیلاما و گئنیش بیر قتلی عاما معروض قالدی.

دوغرودور21 آذر 1324 نجی گونش ایلین تاریخینده، "شهید جعفر پیشه وری" نین لیدرلیغی ایله آذربایجان میللی حوکومتی نین یارانماسی و بئله لیکله گونئی آذربایجاندا تورکجه نین رسمی دیل اولماسی قیسا بیر مدت پهلوی لرین ضیدی بشری سیاستلری نین اویغولانماسیندا بیر دوراقلامایا سبب  اولورسادا ، آنجاق یازیقلار اولسون کی میللی حوکومه تین یئنیلمه سیندن سونرا، 21 آذر 1325 تاریخینده سارسیتیجی بیر سوی قیریم باشلانیب، اون مینلرجه آذربایجان تورکو، تایی گورونمه میش بیر وحشیتله شوونیزمین خنجری آلتیندا قوربان کسیلدی و یوز مینلرجه تورکجه کیتاب، فاشیستلرین کینه سی اودوندا یاندیریلدی. قوشقوسوز "21 آذر ده کی اینسان قیران" فیزیکسل سوی قیریم "26 آذر ده کی کیتاب یاخان" کولتوره ل سوی قیریم، آریاچی فاشیستلرین ابدی جینایت بلگه لری کیمی قید اولونوب، تاریخ بویو سینه دفتر آذربایجان میلله تی نین خاطیره لرینده سیلین مه یه جکدیر.

دوغرودور، اینسانلارین و کیتابلارین بیر زاماندا شهادتلری، 1325 نجی ایلین قیشیندا، نئچه لحظه، آذربایجان میللتی نین میللی یاشامی نین دقیقه سایار عقربه لرینی لاختالانمیش قانلار و توزلانمیش کوللر آلتیندا آغیرلادیب، یاواشلاتسادا، آنجاق کسینلیکله آذربایجان مدنیت گونشی نین پارلاماسی اؤنونو زامان و مکان اوزانتیلاریندا آلامادی. شوبهه سیز 21 آذر ده باش وئرمیش دهشت سوی قیریمدان سونرا، هر بیر آذربایجانلی آغیرلایان و آجییان بیر کولتوره ل سوی قیریما معروض قالاراق، "تورک-آذربایجان" کیملیکی نین آرادان قالدیرما "فاشیستی سیاستلری"ایله بورون بورونا گلدی.

بو نفرتله دولو اولان استراتژیک سیاست، پهلوی حاکیمیتی نین وار  گوجو ایله و یابانجیلار یاردیمیلا بیله، اویغولاندی. درسلیک کیتابلاری نین صحیفه لرینده، اونیوئرسیته کیلاسلاریندا، باسیلمیش کیتابلاردا، یایینلانمیش خبرلرده، نشر اولونموش درگیلرده... خالوار خالوار یالان اوست اوسته قالانیب، تورکلرین یوکسک مقامی اخلاقدا، تاریخده، ادبیاتدا، موسیقیده، هونرده و حتی عیرقدا، آلچاق و آشاغی و بشره قارشی تانیتدیریلدی. بئله لیکله تورکلر، چولچی، داوارچی، بوزقیرلاردا دولانان، وحشی، یاریم مدنی، قانیق، قاتیل، ساواشچی،...کیمین آدلار ایله درسلیکلرده آدلاندی و توپلوم  قصیدیلی اولاراق چوخ چیرکین و ایگرنج "فارس یانا جوکلار" ایله، تورکلر قارشیلیغیندا دولدورولدو. بو سیاستلرین آماجی آذربایجان تورکلری نین میللی اونورونو آشاغیلاما و اودلار یوردوندا فارس شوونیزمی پئشینده اولان سؤمورگه چی لیک آرزیلارینی یئرلشدیرمک ایدی.

فارس فاشیزمی آیریجا چالیشدی تورک میللتینه آئیت اولان قاوراملاری دا گومورسون. بئله لیکله "تورک"، "آذری" اولدو، "آذربایجان"، "آذرابادگان"، آدلاندی، "خزر"، "مازندران" یازیلدی، تورکجه اینسان و یئر آدلاری فارسجایا چئویریلیب و یا دونده ریلدی، گونئی آذربایجان تاریخی اراضی سی 12 اوستاندا پایلاندی، ... و سونوندا آذربایجانین مظلوم اوغوللاری حلال چوره ک قازانماقدان اوترو، آذربایجان جنتیندن فارسیستانین کویرلرینه، چؤلله رینه و قیساجاسی جهنمینه یولا چیخدیلار.

دوغرودور، او ایللرده جبار باغچه بانلار، پروفسور هشترودیلر، غولامحوسئین ساعدیلر... ایرانین کولتور و هونر ساحه لرینده قالیجی ایزلر بوراخدیلار، آنجاق آذربایجانین قازانجی بو قدر میللی خیدمتدن، آذربایجان اویرنجی لرین معنوی آتاسی اولان صمد بی بهرنگی نین قتلی و اریمیش قوروشونلاری قلم صاحیبلری نین آووجلارینا آخیتماقدان سونرا باشقا بیر زاد اولمادی.

ایرانین1357 نجی گونش ایلینده کی میللی دئوریمی، 29 بهمن 1356 نجی تاریخینده اؤیرنجیلر، اؤیرتمنلر و باشقا صینیفلاردان عیبارت اولان تبریز اهالی سی نین قیامی ایله، آذربایجان باشکندیندن باشلاندی و آز سونرا بوتون ایرانی بورودو.

بئله لیکله آذربایجان میللتی29 بهمنده یاراتدیغی فیرتینادان دولایی اونلارجا شهید، یوزلرجه یارالی و مینلرجه اسیر ، عدالت و اوزگورلوگ یولونا سوندو. سونوچدا "شاه اللهی لر" یئنیلدیلر و "حزب اللهی لر" ایش اوستونه گلدیلر. آذربایجان میللتی کی شوونیزمین و ظولمون اومورقاسینی سیندیرماغا و ایلیگینی قیرماغا ایاغا قالخمیشدی، درین ده گیشیکلیکلری بکلیردی. آنجاق گؤردویو تکجه ده گیشیکلیک ، "تاجلی فارس شوونیزمی" نین یئرینه "عمامه لی فارس فاشیزمی" نین گلمه سی اولدو. بیرینجی سی مشروطه سلطنتی، فارس دیلینی و شیعه مذهبی نی اؤز تمللری آدلاندیرمیشدی ایکینجی سیده موطلقه فقیه ویلایتی نی، فارس دیلینی و شیعه مذهبی نی یئنه ده اوز حاکیمیت ایلکه لری کیمین تانیتدیردی.

شاه الهی لرین ساواکی، آذربایجان ایگیدلرینی کومونیست، جاسوس، خائین،... کیمی ایتیهاملاردان دولایی قورخولو  دوستاقلارا گوتوروب اولدوردو و حزب اللهی لرین ایططیلاعاتی وطن اوغوللارینی داها قورخولو تورمه لرده حبس ائدرک پان تورکیسم، بولوجو، جاسوس،خائین،... سوچلار ایله ایشکنجه لره معروض قویدو  اؤلدوردو و هله ده اؤلدورور.

"سیرا اؤلدورمه لر"ی  یولا سالدیلار. "پروفسور محمدتقی زهتابی" کیمین بویوک آکادئمیسین خوجانی، 30 آذر 1377 تاریخینده گیزلی  شکیلده شبیسترده شهادته چاتدیردیلار، اونلارجا کیمیلک سئور اؤیرتمن و یوزلرجه اؤیرنجی، آذربایجان میللی حرکتیندن یانای اولدوغلاری ایچین، زیندانلارا گوتورولوب قورخونج اینجیتمه لره و قوخونج آلچاتمالار  آلتیندا یاشادیلار بلکی جلادلار دئمیشکن"آذربایجان چیریکلرینی چوروتسونلر" ، آنجاق اونلار آنلامدیلار کی آذربایجان میللتی بوسبوتون بیر ابدی اوبهت دیر.

فاشیزم گئچمیش جینایتلره دویمایاراق، چوخ اونلو، زنگین و هابئله او قدر ال آچیق اولان اینسانی، یعنی "غولامریضا مردانی آذری"(تبریزلی) نی، 21 آذر 1385 تاریخینده، یئنی دن باشلانمیش "سیرا اؤلدورمه لر" جینایتلری یولو ایله شهادته چاتدیردی. بو بویوک اینسان 150 میلیارد تومن اؤز شخصی وارلیقیندان آذربایجاندا و بوتون ایراندا مکتبلرین بیناسینا یاردیم آییرمیشدی. سونوچدا "سیرا اؤلدورمه لر" دوغرولتوسوندا مردانی کیمین جؤمرت اینسانین گونئی آذربایجانین 1385 نجی ایلینین بهاریندا قانلی باسدیرمالارا قارشی اعتراض سسی سوسدورولدو .

آیریجا؛

-          قوشاچایدا 6 یاشلی " مهران رحیمی" نین ساده جه "آنا دیلیمده تحصیل آلاماق ایستیرم" جومله سیندن و دیله ییندن دولایی شاللاقدان گویه رمیش اللرینی اونوتماق مومکوندور مو؟!

-          خی یو دا شهید جلیل عابیدی نین ،  آل قانلا بویانمیش شقیقه سینی گوروب سوسماق مومکوندور مو؟!

-          تبریزده وحید داورپناهین قانلی گوز چاناغلاریندا قورشونلاری گوروب قان آغلاماماق مومکوندور مو؟!

-          سولدوزدا آریاچی لارین گولله سینی توحید آذریونون سینه سی اورتاسیندا تاپیپ، جییه ر پارچالاماماق مومکوندور مو؟!

-          تبریزده 15 یاشلی "موصطافا عوض پور"آدلی  مکتب اؤیرنجی سینین ساده جه  دووار اوزه رینده "من تورکم " یازدیغیندان دولایی هفته لر حبسده قالماغینی ائشیدیب، اعتیناسیز قالماق مومکوندور مو؟!

-          اورمودا "ائلمان نوری" آدلی اونیوئرسیته اؤیره نجی سی نین اللرینی ایمتاحان زامانیندا زنجیرده گوروب، زنجیرلری دیشلریمیزله قیرماغا چالیشماماماق مومکوندور مو؟!

-          شاه گولوده "شهید پارام"ین و "شهید صبوحی نژاد" ین جنازه لرینی حووض دیبینده الی – قولو باغلی بولوب، غضبدن فیرتینا سالماماق مومکوندور مو؟!

-          تبریزده، 8 یاشلی "حوسنا " آدلی بیرقیز اوشاقینین، کیمیلک سئور آناسی،"شهناز خانیم غولامی" ایله بیرلیکده حبسه گئتمه سینی بیلیب، ایضطیرابلارا قاپیلماماق مومکوندور مو؟!

هابئله؛

اونلار کی ایللر بویو اؤیرتمنلر صینفینین حاق ایستکلرینی سوپا ایله جاوابلاییرلار و بو یوکسک مرتبه لی و البته ماددی سورونلار ایچره سینده یاشایان اینسانلاری یوخوسوللوغدا بوغولماسینی گوزله ییرلر، اونلار کی زنجاندا کیملیک سئون عائیله لری بیرلیکده  ایسارته گوتورورلر، اونلار کی اوزگور قونوشان اویرنجی لرین ائولرینه سالدیریرلار و "سیاره خانیم رشتبری" کیمین آنالارین آغیر شوکدان دولایی بئیین سکته سینه و "حوسئین بی یوسیفی" کیمین کیملیک سئور اؤیرنجی نین آنا سیز قالماسینا سبب اولور لار، شوبهه سیز قاتیلدیرلر.

اونلار او قدر بیزلردن نفرت ائدیرلر و البته قورخورلار کی، ایران ایسلامی آنایاساسیندا اولان 15 نجی و  فورمالیته بیله یاسانین ایجرا اولونماسیندان دا چکینیرلر.

مینلرجه خوجا، اؤیرنجی، اؤیرتمن و باشقا صینیف صاحیبلری طره فیندن، دوپ دولو احتیراملار ایله، دئولت دائیره لرینه، گوندر دیغیمیز اونلارجا انادیل طوماری نی و تام جوابسیز قالان گوزله ریمیزی و آیریجا قارشیسیندا رژیمین باشدان آیاغا فارس دیلینین ایچریده و دیشاریدا یایینلانمسینین وورغولاماسینی هئچ بیر زمان اونوتمایاجاییق و  البته اونوتماغا دا حاقلی ده ییریک.

آپارتاید رژیمی نین تپکی سی 3333 ایمضاسی اولان تبریزده قورولان بیرینجی آنادیلی قورولتایی نین قعطنامه سینه و دونیا آنا دیلی گونلرینده اون مینلرجه اینسانین موختلیف شهرلرده مدنی ییغینجاقلارینا، ساده جه آرتان باسقی و چوخالان سیخینتی دیر .

بو سورونو کیم جاوابلایا بیلیر؛

35 مین نفرلیک داغینیق ارمنی آزینلیغینین ایراندا، اؤز آنادیلی حاققینا صاحیب اولدوغو حالدا، نئجه مومکوندور کی 35 میلیون آذربایجانلی موسلمان تورک، ایسلام آدینی داشییان بیر رژیمین طرفیندن بوتون آنادیلی حاقلاریندان یاساقلانسین و اونون ان ایلکین ایستکلری وحشیجه سینه باسدیریلسین؟!      

اونلار کی تبریز اونیوئرسیته سینده ارمنی، کوره، سوواحیلی...دیللرینه ائنیش و گئنیش دئپارتمانلار یولا سالیبدیرلار، ندن 2 بیریم تورکجه درسلیکینین اؤیرنجیلره وئریلمه سیندن چیگین قاچیردیرلار؟! بو کولتوره ل ظولملر، آذربایجان اؤیر نجیسل درگیلری نین باغلانماسی، قازئته لرده تورکجه صحیفه لرین قاپانماسی و آذربایجان اوستانلاریندا قوندارما "فاذری" دیلینده یایینلانان وئرلیشلر ایله داها چوخ درینله شیر. بئله نظره گلیر کی آذربایجانین پایی دئولت تریبونلاریندان ساده جه میللی تاریخی نین یالانلاماسی و میللی کولتورونون آشیاغی لانماسی دیر.

"ایران" آدلی دئولت قازئته سی، ایران ایططیلاعات ناظیرلیی اؤنری سی ایله، چیرکین بیر کاریکاتور و ایگرنج بیر یازینی آذربایجان میللتینین ضیددینه یایینلاییر، ایران رادیو - تلویزیونو گئجه گوندوز "فارس یانا" قونوشمالار ایله ایهانتین چیرکین اوخلارینی آذربایحان میلله تینه آتیر و دئولت ناظیرلری و وکیللری "ماهی صیفت" کیمی دلقک لری آلقیشلاییر و هونر مادالییونلاری سینه لرینه تاخیر. آنجاق شیمدی باشقا قورخونج بیر سیاستده یوروتولمه ده دیر.

آپارتاید رژیمی نین اوشاق باغچالاری، عقرب یووالارینا دونوبدورلر. بو مرکزلرده آپارتاید رژیمی نین امریله، مودافیعه سیز یئنی یئتمه لره فارسجا اویره دییلیر . بئله لیکله آنا دیلی نین مکتبدن اونجه، ائوده اویره نمه فورصتی الدن گئدیر. بئله بیر فاشیستی سیاستین ایجرا اولونماسی "کورپه لرین میللی کیملیین بئشیکلرده " اولدورمک دئمک دیر.

اولوسلار آراسی کونوانسیونلار اساسیندا بو طور فاشیستی سیاستلرین ایجرا اولونماسی، تام فاشیزم، راسیزم و داها دوغروسو کولتوره ل جنوسایدین  آنلامیندادیر و بئله بیر دئولت لر ایچین آغیر سوروملولوقلار گتیره جکدیر.

ایرانین بوتون مکتبلرینده تحصیل آلماقدا اولان فارس و غیری فارس اؤیرنجیلر، آپارتاید رژیمی نین راسیزم اوزه رینده قورولان سیاستلرینین آماجیندادیرلار. 14 میلیون مکتب اؤیرنجی لرینین هفته ده اوخونان درسلیکلرینه باخاراق آنلاشیلیر کی مهر آیی نین بیرینده مکتبه گئدن بوتون اؤیرنجی لر، جیدی بیر تهلوکه ایله قارشی قارشیا گله جکلر. شوبهه سیز ایرانین تعلیمات ساحه سینده سوروملو اولان ناظیرلیکلر، هر نه دن اونجه، فارس دیلی نین گئنیشجه سینه یاییلماسیندان، فارس دیلی نین اوستون اولماسیندان و بو دیلین میللی بیرلیکی قوروماسیندان یانادیرلار. بو باخیش سبب اولوب کی فارس دیلینه هر بیر درسدن داها آرتیق اؤنم وئرسینلر و اونون قات ساییسینی (ضریبینی) کنکوردا 4 ،  یا داها دوغروسو، ان یوکسک قات سایی تعیین ائتسینلر.

آنجاق بو تهلوکه نین ائتکیسی ساده جه قومیتلری هده له میر. ایراندا هر بیر اؤیرنجی، مکتبده آپارتاید رژیمی نین تلقینلری آلتیندا تحصیل آلیر. بو اؤیرنجیلره اؤیره دیلیر کی ایران ایسلام جومهوریتی نین گئریجی و ضیدی بشر ایدئولوژوسو دونیادا ان اوستون دونیا گؤروشودور. بو بولانیق اورتامدا فارس اؤیرنجیلری ده بئله اؤیرنیرلر  کی فارس دیلی، کولتورو و تاریخی ان اوستوندور.  یئنی یئتمه لره بئله ایناندیریلیر کی اونلارین (سؤزده) بو اوستون مدنیتین حایاتی، ایراندا اولان باشقا مدنیتلرین، خوصوصیله "آذربایجان- تورک" مدنیتی نین ضعیفله مه سی و آلچاقلاماسی ایله مومکون اولاجاقدیر.

بئله درسلیکلرین اؤیردیلمه سی، ایستر ایستمز اؤیرنجیلری ائتنیک شوونیزمینه و یا مذهب فاشیزمینه یونه تیر و بو یئنی یئتمه لری گنجلیک زامانیندا باشقا قومیتلره قارشی آشیری داورانیشلارا آلقیشلایاجاقدیر. آیریجا بئله بیر درسلیکلرین اؤیرنجیلره وئریلمه سی، 3 دن 2 غیری فارس ایران اؤیرنجی لرینی "کولتوره ل اینتیحارا" ایته له مکدیر.

اپارتاید رژیمی نین باشچی لاری چالیشیرلار کی یالان و ده گیشیک تاریخ درسلری ایله، بوتون اؤیرنجیلری و اؤزه لیکله غیری فارس اؤیرنجیلری "کیملیک آلزایمر" خسته لیینه بولاشدیرسینلار. اونلار چالیشیرلار کی خوصوصیله اذربایجان میللتی نین بوتون غورور و کیملیک قایناقلارین و دایاناقلارین سیلیب، آذربایجان اؤیرنجی لرینی بؤیوک بیر بوشلوقدا بوراخسینلار. یازیقلار اولسون کی فارس فاشیزمی بو سیاستی اویغولایاراق، آذربایجانین میللی و تاریخی گئچمیشی نین تخریب یا قاچاق اولونماسی قارشیسیندا اؤزه ل بیر اؤنلم آلماماقدادیر. داها دوغروسو فارس شوونیزمی چالیشیر کی بوتون ایراندان یاشاین میللتلرین کولتورون ازیب، بیر"کولتوره ل نئوپان"، فارس کیملیکینین یاپیشمایان یاپیشقانی ایله اوره تسین.

شوبهه سیز کی آذربایجان میللتی چوخ درین بیر سایغی ایله فارس خالقینا باخیر و تاریخ بویو بو سایغی نی ان یوکسک بیر درجه ده گؤسترمیش و هله ده گؤسترمکده دیر. آنجاق یازیقلار اولسون کی فارس شوونیزمی بو قدر انگین و زنگین سایغی نی اژنمسه مه دی واؤنمسه مه مکده دیر.  بئله کی فارس شوونیزمی نین داورانیشلاریندان دولایی، فارسجا بیر "قاتیل دیل" کیمی ایراندا بوتون غیری فارس دیللری هده له مکده دیر. بئله بیر تهدید کی دئولتین سایسیز - حئسابسیز  ایمکانلاری نین "دو پینگی" ایله مومکون اولموش سونچودا فارسجا دیلی نین و فارس ائتنیکی نین ضررینه قورتاراجاق و اونلارا قارشی باشقا خالقلارین سایغی سی نی گوندن گونه دوشوره جکدیر.

گونئی آذربایجان میللی بیرلیک شوراسی اینانیر کی؛

مهر آیی نین بیرینده، مکتبلرین و اوخوللارین آچیلماسی ایله برابر اؤیرنجیلرین هیجان ایله صینیفلارا گئتمه لرینه رغما، بئله نظره گلیر کی بو اؤیرنجی لر اصلینده صینیفلارا یوخ بلکی "کولتور یاندیران کوره لره " دوغرو گئدیرلر. بو کوره لرین آماجی "یانیق بئیینلر"ی توپلوما گونده ر مکدیر.

گونئی آذربایجان میللی بیرلیک شوراسی اینانیر کی؛

آنا دیلینده تحصیل آلماق، هر بیر میللتین ایلرله مه و اینکیشافیندا ان اؤنملی تمللردن بیریسیدیر. نییه کی تاریخ بیر چوخ میللتی خاطیرلاییر کی اؤز آنا دیللرینی ایتیرمکدن دولایی، "میللی اؤلوم" فاجیعه سی ایله ال به یاخا اولوبدورلار.     

گونئی آذربایجان میللی بیرلیک شوراسی اینانیر کی؛

"قاموسوموز ناموسوموز دور!"

مهر آیی نین بیرینده شوونیزمین زیللری "کولتور یاندیران کوره لر"ینده سسله نه جکدیر.

کورپه لریمیزین آجی تقدیرینه داها آرتیق دوشونمه لییک!

 گونئی آذربایجان میللی بیرلیک شوراسی

جمعه 23 شهريور 1386

جهت خواند متن فارسی بیانیه کیلیلک بفرمایید:

بیانیه شورای اتحاد ملی آذربایجان جنوبی به مناسبت بازگشایی مدارس